إزاي تعرض مشروع تخرجك!!
طبعًا كل الملاحظات الي هذكرها هنا مش هي الوحيده..لأن في مهارات تانيه كتير بتعتمد علي شخصيتك كمهندس ولازم تبقي عارف إن فكرتك لو اتعرضت بشكل سئ هتبان إنها ضعيفه..يعني لو العرض بتاعك كويس والجوده بتاعتك أي كلام هتبان إنها حاجه محترمه.
- لازم تخزن كل الملفات بتاعة المشروع بإصدارات ممكن تشتغل علي أي جهاز..يعني لو شغال علي برنامج كاد 2017 لازم تخزن ملف بإصدار كاد 2000 مثلا.
- ممكن تحتفظ برده بنسخه مطبوعه لمشروعك بعدد مساوي لأعضاء التقيم لأن ممكن نظام العرض يعطل أو الكهربا تقطع ومحدش ضامن حاجه دلوقتي..فساعتها توزع علي كل واحد نسخه وتناقش مشروعك من النسخه الي معاك(تفكير مهندسين)
- لازم تقفل الموبايل بتاعك وإنت بتناقش المشروع لأنه هيرن(دا لمصلحتك انت والله)
- حاول تتكلم بصيغة الرسومات هيبقي أفضل وتعرض صور لمشروعك أكتر.
- أول ما تبدأ لازم تعرف مشروعك الأول عبارة عن ايه وتعرض المخططات بتاعته.
- لو هتتكلم باللغه العربيه الفصحي يبقي متقولش Beam أو Slap أو column اسمها كمره أو بلاطه أو عمود.
- في حاجات بقا بتعصب لجنة التقيم في موضوع الإنجليزي ده لازم تخلي بالك منها..جمع كلمة beam مش بيمات وجمع slap مش سلابات..اسمها Beams وslaps.
- في حاجه كمان زي النقطه رقم 7 إياك تكتب كلمة "استركشر"بالعربي كدا..اكتبها بالانجليزي كدا"structure".
- وانت واقف تعرض المشروع اختار مكان كويس تقف فيه بحيث ان الكل يبقي شايف العرض مش تبقي واقف قدام الشاشه ومحدش شايف حاجه.
- لو انتم ثلاثه في مشروع واحد يبقي الي هيعرض المشروع يعرف عن الاتنين التانين وبعدين يعرف نفسه.
- وانت بتعرف زمايلك في المشروع أو بتعرف نفسك إوعي تستخدم مصطلحات زي المصطلحات الي بنستخدمها مع بعض..زي أخوكم في الله كذا..تمام فعلا احنا إخوات فالله..لكن شوف الإعلامين في نشرات الأخبار والبرامج بيعرفوا نفسهم ازاي في بداية كل برنامج.
- لو في زميل تاني هيكمل بعدك يبقي يكمل علي طول وبلاش التحيه والسلام أو يعرف نفسه تاني.
- الشريحه الي انت بتعرضها لازم تراجعها أكتر من مره علشان تتجنب الأخطاء اللغوية والإملائيه.
- وانت بتعرض برده ابقي خد بالك من ايدك..متبقاش في جيبك..متبقاش ورا ظهرك..ومتكتفش ايدك..متشبكش صوابعك..شاور بايدك علي الشاشه..ولو هتشاور بصوابعك يبقي بالسبابه..استخدم ايدك للتعبير زي المذيعين.
- حاجه مهمه جدا انك لازم تبقي متفق مع زمايلك علي كل حاجه في الإلقاء علشان ميحصلش مشاكل أو تصادم.
- لما لجنة التحكم تبدأ تسأل لازم تبقوا متفقين مين الي هيجاوب..تجنبوا انكم تجابوا مجموعه في نفس واحد..والأفضل انكم تبقوا منسقين مع بعض علي نوعية الموضوعات الي كل واحد هيجاوب عنها.
- تجنب كلمات زي عملنا كذا أو استخدمنا كذا..قول درسنا كذا وبحثنا في كذا.
- يفضل انك تشرح من غير وسيلة قراءه في ايدك(دفتر أو ورقه تقرأ منها يعني)وسيلتك هيا الشرائح بس..ولو مضطر انك تستعين بورق يبقي ورق زي الي المذيعين بيمسكوه في البرامج يكون متقطع بشكل كويس.
- حاول تظهر بشكل كويس ويفضل ان لبسك يكون رسمي..يعني تبعد عن الموضه والبناطيل الجينز المقطعه من عند الركبه والحزام أبو توكه كبيره ده..وشعرك بلاش القصات إياها الافته للنظر والجيل لأن لجنة التقيم هتنشغل بشعرك وهياخدوا عنك انطباع وحش.
- حاول تبقي ثابت ومتتحركش كتير وتفضل رايح جاي.
- في ناس بتطلع شايله أدوات شخصيه في ايدها زي السبحه مثلا..بلاش الحاجات دي.
- حاول تلفت النظر بصوتك واتكلم بثقه وصوت مسموع.
- لو واحد هيشرح والثاني هيقعد علي الجهاز يدوس Next يبقي ميحطش رجل علي رجل ويفضل يهزها.
- في ناس بتطلع وهيا بتاكل لبان عشان التوتر..لاء دا غلط ومعناه انك مش بتحترم الناس الي قاعده.
- لو حد من أعضاء لجنه التقيم اتكلم إياك انك تقاطعه بالرد..انت تستني لحد ما يخلص كلام وبعدين تدافع عن نفسك بهدوء..انت مش في حرب.
- حاول تختصر علي قد ماتقدر وتتجنب التفاصيل علشان متوقعش نفسك في مشاكل انت في غنا عنها.
- لازم توثق المعلومات بتاعتك بالمراجع.
- بلاش تضحك وانت بتناقش وزميلك الي بيضحكك متبصش عليه.
- اتجنب بعض الحركات زي العب في الشعر أو حك الجسم أو الأنف.
وبالـتـــوفــيق للـجــمــيــع إن شـــاء الـلـه
أخوكم محمد عثمان
تعليقات
إرسال تعليق
تـعـلـيـقـك يـهـمـنـا