التحويل إلي أوتوكاد كلاسيك بدون أي سكربت Autocad Classic Workspace

 قواعد عشان تحل امتحان الخرسانه بالسنس

"أنا عارف إن الوقت مش هيكفي .. أنا بس عاوز أشوف السنس بتاعك كمهندس"

من أشهر الجمل اللي بنسمعها قبل امتحان الخرسانة .. وللأسف ساعات بعده بس بتكون الفرصة ضاعت

وعشان الفرصة دي متضيعش منك .. وعشان الخرسانة أهم مادة في مدني وعشان اللي حصل في طلبة عين شمس .. لازم تخلي بالك لأن مينفعش تلبس انت كمان..ركز كويس في المقال ده عشان تحبط المخطط الماسوني لدكاترة الخرسانة :D :D

• لازم تعرف إن أهم حاجة في الخرسانة إنك تكون فاهم مش حافظ
• كل العناصر اللي بتصممها ليها نفس المبدأ في التصميم وتقريبا الاختلاف بيكون في طريقة ال analysis عشان تحسب القوي والاجهادات اللي هتصمم عليها
• كلمة تصميم دي معناها انك بتعمل 4 حاجات (قطاع خرساني – حديد تسليح – قطاع آمن – قطاع اقتصادي) يعني لو حاولت تفرض حديد من دماغك .. حاول تخليه safe وفي نفس الوقت اقتصادي .. عشان متطلعش منك أوت
• لازم تكون عارف إن الأقطار المتاحة في السوق هي 8 و 10 للكانات (وممكن 12 في الشير وول) أما الأعمدة والكمرات والبلاطات فمعاك 10 و 12 و 16 و 18 و 22 ... يعني اوعي تستعمل 14 أو 20 لأنهم مش موجودين في السوق .. أما بقي الأقطار الكبيرة زي 25 غالبا مش هتطلع معاك الا في مسائل التغطيات الكبيرة زي الفريمات وكده
• الحاجات اللي انت بتصمم عليها أو بتعمل check عليها وانت شغال هي:
  - ال Moment .. غالبا بتستعمل طريقة C1 & J
  - ال Normal .. ودي ليها شوية قوانين كده في كتاب شاكر
  - ال Shear .. وده في حال انه اتطلب منك .. وليه حوالي 3 خطوات برده في كتاب شاكرال Torsion .. وده برده في حال انه طلبه .. أو في حال انه جابلك مثال مشهور انت عارف ان فيه تورشن وطريقته قريبة جدا من ال Shear- ال Deflection .. وده نادرا اما بيتطلب .. وموجود برده في كتاب شاكر
• لازم تفهم كويس أوي ان الحديد بس هو اللي بيشيل الشد (لأننا بنهمل مقاومة الخرسانة للشد) عشان كده الحديد بيتحط في اتجاه المومنت (اتجاه الشد)
  لحد هنا قشطة ؟
  عشان تبدأ تصميم بقي لازم تفهم شوية الحاجات دول في ال Structure :
• الشد دايما بيكون ناحية المومنت .. دايمااااااا
• لما تكون الركيزة من تحت (زي الأسقف والكمرات مثلا) بيكون المومنت الموجب في نص البحر .. والمومنت السالب عند الركيزة .. والعكس صحيح (هتقابلك في اللبشة)
• حديد التسليح بيتحط ناحية المومنت .. يعني في حالة البلاطات .. في نص البحر الحديد الأساسي هيبقي سفلي .. وعند الركائز هيبقي علوي
  وخلي بالك .. لو عندك بحر صغير بين بحرين كبار اتأكد ان المومنت لحق ينزل موجب فيه لانه ممكن يتعلق كله سالب فوق
• لما تكون القوي مركزة بيكون شكل الرسم بتاع الاجهادات خطوط مستقيمة .. ولو الحمل موزع بانتظام بيكون شكل الرسم منحني درجة تانية وهكذا
• القاعدة الأساسية في رسم ال Shear .... "اطلع مع الطالع .. وانزل مع النازل"
  
  ركز بقي شوية في النقط اللي جاية دي:
  
• حاول متفرضش قيم اجهادات من دماغك وتصمم عليها .. لأنك كده هتضيع درجة الاستركشر كلها
• بما انك طلعت المومنت غلط في الخطوة اللي فاتت .. حاول متطلعش بقي حديد التسليح غلط..لأنك هتعرفه انك مش فاهم ..يعني لازم قيمة التسليح تكون منطقية..لا هو عالي أوي .. ولا هو قليل أوي .. (مينفعش مثلا سوليد سلاب يوصل تسليحها فاي 16.
  لما تعطل استعمل القانون ده عشان تشوف الحد الأدني للتسليح
  min st= 11/(fy*b*d)
• أي منطقة فيها Shear كبير .. بنكثف فيها الكانات..وده عند الركائز من الآخر ..يعني مثلا ال Minimum بتاع الكانات في الكمرات 5 فاي 8 للمتر..يبقي تيجي عند الركيزة وتضاعف مرة ونص .. فيبقوا مثلا 8 فاي 8 /م.
• احفظ دي كويس أوووووووووووووووي "تداخل مومنت يعني تباعد حديد .. والعكس صحيح" .. غير كده كل سنة وانت طيب..Fatal mistake !!..زي السلم كده .. ولو جابلك كمرة مكسرة ولا حاجة اعرف انه عاوز يختبرك في دي .
• الحديد الثانوي للكمرات (اللي فوق يعني ... أيووووة اللي بيتعلق فيه الكانة ده) بتكون قيمته 20 % من الحديد الأساسي للكمرة ومتقللوش عن 2 فاي 12
• أقصي عدد أسياخ ممكن ترصه في القطاع بييجي من العلاقة (n=(b-25)/(@+25)) .. ال n هي أقصي عدد أسياخ ... و b هي عرض القطاع (الكمرة) و @ هي فاي (قطر السيخ) والأبعاد بالملليمتر
• أقصي عدد للصفوف ممكن ترصه في الكمرة هو 3 صفوف .. ولو هتستعمل أكتر من صف متنساش تحط Spacer
• أي قطاع عليه M & N بيكون تسليحه أقل شوية من القطاع اللي عليه M بس وبيكون أقل بحاجة بسيطة .. (سيخين مثلا) .. ومش مهم دلوقت تفهم ليه .. بعد الامتحان ابقي اتأكد براحتك .. مفيش وقت تفهم 
• القانونين الأساسيين في تصميم الخرسانة هم C1 & J ... يعني من الآخر هات المومنت والأبعاد واشتغل .. ولو معرفتش تجيب الأبعاد افرضها
• كل ما قطاع الخرسانة بيزيد .. التسليح بيقل .. والعكس صحيح لكن اوعي تنسي ال Minimum
• زتونة ال Minimum اهي
  - في الكمرات 12 سم ... 2 فاي 12
  - في الكمرات 25 سم ... 4 فاي 12
  - في البلاطات السوليد ... 5 فاي 10 /م ... واوعي تنسي لكل متر دي
  - في البلاطات الفلات ... علوي 6 فاي 10 /م ... وسفلي 6 فاي 12 /م ... وممكن في السلم تزود سيخ عشان خاطري انا
  - في الهولوبلوك ... للأعصاب 2 فاي 12 /ع ... والشبكة اللي فوق 5 فاي 10 /م
  طبعا كل القيم اللي فوق دي بالحب..يعني دي حاجة تمشي نفسك بيها في الامتحان بس لما تتزنق .. لكن بره الموضوع مختلف .
• متحاولش تبرشم .. كل القوانين تقريبا موجودة أصلا في كتاب شاكر ... مش مطلوب غير انك تعرف مكانها بس..(لو بتدخل الامتحان من غير كتاب شاكر يبقي عدي النقطة دي وبرشم القوانين).
  
  بالنسبة للرسم بقي .. خلي بالك من النقط دي:
• الرسم أهم من النظري
• و قفلت معاك ومعرفتش تجيب أي قيمة للتسليح اعمل الرسمة من غير قيم وبينله انك فاهم الحديد بيتحط فين وأهو نص العمي ولا العمي كله
• كانات العمود بتكمل جوه الكمرة .. لكن كانات الكمرة بتبدأ من وش العمود
• قفل الكانة لازم يظهر في ال Cross section بتاع الكمرة .. وبيكون ناحية الضغط يا هندسة .. مش الشد
•  الكمرات بتكون عمودية على القطاع .. يعني لو عندك كمرة مايلة ارسم الكانات عمودية عالقطاع .. مش رأسية
• نظافة اللوحة مهمة جدا واوعي تنسي الأبعاد وأسماء المساقط والقطاعات